May Iren Lorgen Flem sitt bilde "The Dukes dinner" gjekk til topps i klubbkonkurransen i april.

Marianne With-Nord; Apples4you

Monica Elise Vatnehol; Delicious

På medlemsmøtet 12.april var vi ca. 40 medlemmer som møtte opp. Programmet vart litt annleis enn opprinneleg tenkt, ettersom John måtte til Oslo i jobbsamanheng denne dagen. Temaet «Bruk av lys i naturen», vert derfor sett opp på maimøtet - og før den tid håper vi at det har kome på plass solskjerming på musikkrommet!

Klubbkonkurranse MÅLTID

Kvelden starta med at Håvard gjekk gjennom dei 16 bilda som var innleverte til konkurransen med tema Måltid. Denne gongen var det mange som på førehand hadde kommentert bilda i galleriet. Dette hadde Håvard tatt utskrift av og han oppfordra oss til å seie litt meir i forhold til ros og ris som hadde kome. Svært positivt at medlemmane kjem med kommentarar; både i galleriet og på møtet. Det er dette vi lærer av!

Etter ein pause vart det avslørt kven som hadde sanka flest poeng denne gongen. Og dei tre første plassane gjekk til May Iren Lorgen Flem med The Dukes dinner, Marianne With Nor med Apples4you og Monica Vatnehol med Delicious.

NORDIC LIGHT utstilling

Neste post på programmet var Arnold som presenterte ni av dei ti bilda som skal representere Skodje fotoklubb under Nordic Light fotofestival i Kristiansund i slutten av april. Her har det vore ei intern klubbkonkurranse der 40 bilde kom inn. Styret har plukka ut ni bilder og det tiande vart valt av dei frammøtte på klubbmøtet. Bilda kan du sjå i eiga mappe merka Nordic Light i galleriet, og litt meir om fotofestivelen og dei bilda som er utplukka finn du HER.

TEKNISK KVARTER

Siste del av klubbmøtet var avsett til teknisk kvarter, som vart ganske kraftig utvida tidsmessig denne kvelden. Det kom spørsmål om korleis ein kan lage slideshow i Elements, men ettersom ingen av dei som var tilstades ga til kjenne om dei hadde særleg erfaring med dette, gjekk Arnold i staden igjennom og viste i praksis korleis ein lagar slideshow i Lightroom. Vidare viste han litt av det nye som har kome i Lightroom 4. Denne versjonen er no i salg til ein langt rimelegare pris enn det som programmet har kosta tidlegare. Så fekk vi ein praktisk demonstrasjon av korleis ein skalerer bilde for web i Lightroom, Elements og IrfanView. Nokre av oppskriftene finn du i forumet, - andre finn du i Arnold sitt Lightroomhefte. Til slutt vart det kort vist korleis ein leverer bilde til NSSF si landskokurranse. Der er fristen for levering 15. april.

Elles er no kleda frå Arbiro ferdige. Fleire kasser med ulike klesplagg med Skodje fotoklubb sin flotte logo på er leverte, og Monica held orden på størrelsar, fargar, antal, beløp og innbetalingar.